Муниципальное дошкольное образовательное учреждение
«Детский сад №2» с. Помоздино.
Гажöдчöм сценарий 6-7 арöса челядьлы.
«Эжва дорын гаж».
Составители:
Воспитател – Селиванова Е. И. (1 категория),
Музыкальный руководитель – Осипова И. Н. (без категории)
Ноябрь 2020 год.
Могъяс:
- Тöмöдны посни войтырöс коми традицияясöн, коми му историяöн да культураöн.
- Ышöдны дзолюкъясöс пыдди пуктыны ас чужан му.
- Сöвмöдны коми кыв – ассьыс чужан кыв.
- Тöдмöдны кыдзи овлöмаöсь важöн, мый новлöмаöсь да кыдзи шойччывлöмаöсь.
Гаж кежлö дасьтысьöм:
- Кывбуръяс да сьыланкывъяс велöдöм.
- Костюмъяс дасьтöм.
- Декорация дасьтöм.
- Небöгъяс, видеороликъяс видзöдалöм.
- Экскурсия вылö ветлöм.
Гаж нуöдöм.
Жыр мичмöдöма: водзас ю, ю берег дорын пыжъяс, берег вылын куйлöны керъяс, саяс быдмöны пуяс.
Берег вылö котöрöн локтö нывка.
1-ой Нывка: - Нывъяс, локтöй таччö, зэв мича местаыс и пуксьыны эм мый вылö!
Ныкаяс котöрöн локтöны, пуксялöны керъяс вылö.
2-öд Нывка: - И збыль местаыс зэв мича. А зонъясыд миянöс аддзасны?
3-öд Нывка: - Сьылыштамöй. Кыласны сьылöмсö да локтасны. Ывлаыс сэтшöм лöнь, сьылöмыс ылöдз кылас.
Нывъяс заводитöны сьывны сьыланкыв: «Уна нывъяс».
- Уна нывъяс чукертчисні,
Зон, зон мича нывъяс,
Зон, зон мусса нывъяс чукöртчисні.
- Эжва дорö лэтчалісні.
Зон, зон мича нывъяс,
Зон, зон мусса нывъяс лэтчалісні.
- Керъяс вылö пуксялісні,
Зон, зон мича нывъяс,
Зон, зон мусса нывъяс пуксялісні.
Берег вылö локтöны зонъяс. Сьылöны «Паськыд гажа улича».
- Паськыд гажа улича, улича,
Доли-шели, ноли-шели,
Говоринскöй улича.
- Уличаас ныв олö, ныв олö,
Доли-шели, ноли-шели,
Говоринскöй ныв олö.
- Ныліс дінö зон волö, зон волö,
Доли-шели, ноли-шели,
Говоринскöй зон волö.
1-ой Зонка: - Мича места аддземныд. Позьö кö тіян дорö пуксям.
Нывъя, öдйö мукöд керъяс вылысь пуксьöны öти кер вылö. Кинаныс петкöдлöны зонъяслы, мед найö пуксисны мöд кер вылö.
Нывъяс: - Пуксьöй, эм тай пукаланіныс. А кöн нö гудöкасисьныд?
2-öд Зонка: - Гудöксö вунöдöма, гортас котöртіс.
3-öз Зонка: - А Эжваыс талун кутшöм мича.
Катя Карманова. «Чужанінöй менам Эжва йылын».
- Чужанінöй менам Эжва йылын, Йирсьöны кöн мöсъяс веж луд вылын. Кöні Эжва ассьыс вынсö босьтö, Ок и гажа сэні, сё мокасьтö!
Кöні Парма авъя ныв кодь мича, Кодкöд некор муслунöй оз личав. Муса рöднöй сиктöй, Эжва дінöй Ставыс тайö менам чужанінöй.
Даяна Уляшева. «Чужанінлысь ловсö кыла».
-Чужанінлысь ловсö кыла – Сьыла. Батьлöн муыс мусса, дона – Ёна. Öти вужйöн сыкöд ола, - Кола.
Локтö гудöкасьысь.
4-öд Нывка: - Сергей локтö! (вешйыштö, кыдз быттьö места вичмöдö) – Ме дінö пукси!
5-öд Нывка: - Мыйла тэ дорö, (вешйыштö, кыдз быттьö места вичмöдö) пукси, Серёжа, ме дорö.
Серге: - Ставныд нывъяс мичаöсь да шаньöсь. Ог кöсйы некодöс кедзовтны. Пукся таччö шöрас. (пуксьö). Но мый, нывъяс да зонъя, сьылыштам да йöктыштам.
Ставöн сувтöны кытшö. Частушкаяс:
- Гудöкöй тэ, лэчыд гöлöс,
Гажöд менсим сьöлöмöс,
Сьылыштам ми частушкаяс
Асьнымöс ми гажöдам.
- Эжва кузя пуръя кывтö,
Балалайкаöн ворсö,
Балалайкаöн ворсö,
Коми сьыланкыв сьылö.
- Шондібанöй шондіöй,
Гежöда петавлывлан.
Шондібанöй милöйöй да,
Гежöда колльöдлывлан.
- Кор нин бара, корн ин бара,
Кор нин бара аддзысьлам?
Кор нин бара, корн ин бара,
Кор нин бара кутчысьлам.
- Милöйöй да милöйöй,
Шонді булки чужöмöй.
Шонді булки чужöмöй да,
Юмов преник вомдорöй.
- Нывъяс сьылöй, нывъяс сьылöй,
Менö кöть гажöдыштöй.
Менö кöть гажöдыштöй да,
Менсьым шог пальöдыштöй.
- Век ме сьыла и гажöдча,
Век ме гажаа ола.
Медым йöзыс эз казявны,
Мый милöй вöсна шогся.
- Öшинь улын кыдз пу быдмö,
Менсьым öшинь сайöдö.
Помöсдінса мича зонмыс
Менсьым сьöлöм шогöдö.
- Тонö менам сарапанам
Чукля кока петукъяс.
Ачым абу чукля кока,
Чукля кока жöникъяс.
Зонъяс дугдöны йöктöмысь. Öтлаын шуöны нывъяслы:
- Ми чукля кокаöсь?
Нывъя öтлаын: - Да ми жö шмонитам!
Зонъяс: - Ми тшöтш кужам шмонитныыд!
Захар Запарий:
- Чöскыд яблöк сёйис Оля
Аддзис пытшсьыс ичöт лёльö.
Вöлöм яблöк пытшкас олö,
Сылы тшöтш жö сёйны колö.
Рома Мартюшев:
- Петіс шонді. Кыськö чирк
Дзоридз пиöд – звирк да звирк.
Югыд шондіыслы рад,
Гожöм сылы – медбур кад.
Кутны кöсйи, да эз шед.
Водзö чеччавлас нин мед.
Нывъяс: «Полысь олысь».
- Тöрöкан, тöрöкан,
Мый нö устö легöдан?
Арсений Третьяков:
- А ме пачлöн потасас
Кадсö веся лота со.
Колö шкаплань волыны,
Да со мыйкö пола на.
Друг ог удит усйысьны,
Мынтыся сэк усъяснам.
Нывъяс öта-мöд бöся:
Таня Шебырева.
-Код нö тайö эськö, коді
Паныд локтö тшапа?
Катя Карманова.
-Öти кокас киссьöм боті,
Мöдас розя тяпи.
Анита Третьякова.
-Юрас кытшöд повзьöдчана,
Гуга дöрöм-гача.
Анись Игнатова.
-Видзöдлас кö рöмпöштанö
Асьсö оз тöд ачыс.
Даяна Уляшева.
-Вöлöма кö, тайö талун
Сева гöсти мунö.
Сева Уляшев.-
- Нимтöй менö: «Пöлöкалö,
Нимöй збыль öд вуні».
Валера Игнатов «Пес тэчысь».
-Захар миян – молодеч,
Пестö, майбыр, дыр оз тэч.
Мöжгöны кö мукöд,
Сылöн артмö здукöн.
Жаль, мый пöлöс визьöн –
Чипас рытнас киссьö.
Таня Шебырева «Юмпель».
- Юмпель, Юмпель – юмов рöд,
Мыйла эськö юмовсьыс он пöт?
Кампет – преник тэнад зептын тыр,
Öтнад гуджган гусьöн, быттьö шыр.
Вова Пашнин.
- А мен сэсся нинöм дзик оз ков,
Нянь кöть сов.
Юмовторсьыс менам кыптö лов,
Сьыв да ов, сьыв да ов!
Но ог некор оласногöс дзуг
Весиг здук.
Кыдз нö тэныд чöскыдтор ог юк,
Тэ кö друг, менам друг.
Таня Шебырева: - Нывъяс, зонъяс пемдыны кутіс. Гортлань колö мöдöдчыны.
Арсений Третьяков: - Вайöй пыжъясöн кывтам Эжва кузяыс.
Зонъямс да нывъяс корсьöны аслыныс пöвнысö, пуксялöны пыжъясö да сьылыгтырйы заводитöны кывтны Эжва кузя.
Сьыланкыв «Кывта, кывта Эжва вывті».
- Кывта, кывта Эжва вывті
Кывта, кывта Эжва вывті
Векни пыжöн, векни пыжöн.
Кывта, кывта Эжва вывті
Векни пыжöн, векни пыжöн.
- Берег пöлöн, берег пöлöн
Берег пöлöн, берег пöлöн
Пелысь быдмö, пелысь быдмö.
Берег пöлöн, берег пöлöн
Пелысь быдмö, пелысь быдмö….
Пом.
Литература:
- Коми республикаса культура министерство Государственнöй народнöй творчестволöн Центр.
А.К.Микушев, П.И.Чисталев, Ю.Г.Рочев. «Коми йöзкостса сьыланкывъяс». Сыктывкар 1995.
- Издательство «Титул» г. Сыктывкар «Чужанінлысь ловсö кыла». Вячеслав Бабин, Иван Ногиев, Эдуард Тимушев. Кулöмдін районса гижысьяслöн небöгъяс.
-
-